#Очиқ саҳифа
#Аёл маърифати
Қоронғу тун. Юлдуз милтирар,
Тун қаърига кетаман сингиб.
Чиндан ёқар, тун менга ёқар,
Ўй сураман оромдан кечиб.

Ҳар гўшада сокинлик бийрон,
Оломон йўқ. Жим-жит хиёбон.
Тун пардаси очилар аста,
Кўнглимдайин ёришар осмон.

Гўзаллиги айлайди мафтун,
Кун кетидан туғилажак кун.
Чиндан ёқар, тун менга ёқар,
Юлдуз порлаб кўнглимни ёқар.
***
Мажнунтол
Сой бўйида маюс, лол,
Сумбулимсан қадди дол.
Ошиқларга мажнунтол,
Ёр изҳорин сўйлай қол,
Мажнунтолим, мажнунтол.

Лайлисига мажнун зор,
Фарҳод ёрга интизор.
Япроқларинг дил изҳор,
Сабо эсса бўл иқрор,
Мажнунтолим, мажнунтол.

Яшнаб тургин мажнунтол,
Муҳаббатга бир тимсол.
Ошиқларнинг қалби дол,
Сув бўйида мангу қол,
Мажнунтолим, мажнунтол.
***
Кечинма
Сув бўйида турибман ёлғиз,
Енга олмай туғёнларимни.
Менинг ҳиссим ҳадсиз, ҳудудсиз
Ошкор этар фиғонларимни.

Томчиларга туйғумни сочиб,
Алдаб келдим ожиз
кўнглимни.
Эй, тўлқинлар, қайтингиз олиб,
Оқиб кетган менинг севгимни…
Зайнаб Тожиева