Қизларжон

         Оҳ, қизларжон, сирли ҳилоллар!
Ойчеҳралар гўзалсиз ойдай,
Кундай ойдин, шафақдай сулув.
Шивирлайсиз қиқирлаб сойдай,
Кўнгилларга оқади ғулу,
        Тошиб кетманг дарёдай фақат.

       Оҳ, қизларжон, нурли билоллар!
Яноғингиз қизғалдоқ алвон,
Чақноқ нигоҳ, кўзлари чарос.
Таърифлашга ожиздир забон,
Қамаштирар нурафшон чароғ,
       Туйғуларга инмасин ғафлат.

      Оҳ, қизларжон, ёқут лолалар!
Атиргулга ўхшайсиз кўпроқ,
Ифорингиз таралгай майин.
Гуллагайми изларда тупроқ,
Гулхуморга айланган сайин,
        Тиканлардан тилайсиз шафқат.

       Оҳ, қизларжон, зумрад жолалар!
Эгиласиз мажнунтол мисол,
Саболарни қучасиз кулиб.
Тортқилайди сочингиз шамол,
Чопқиллайсиз қувончга тўлиб,
        Тўфонлардан етмасин офат.

        Оҳ, қизларжон, қалби жилолар!
Орастадир оила сиз-ла,
Сиз борсизки бардавом ҳаёт.
Безангансиз ҳусну хулқ ила,
Нафосатга йўғрилгай ҳаё,
        Тарк этмасин ибо-ю иффат.

Муслима Ҳамроз
6.10.2022 йил