Фикрат учқунлари

• Ташбеҳлар билан безанган инжа шеър ҳам ифорли раъноси, ҳам ҳусни аълоси, ҳам камоли маъноси ила дилларни мафтун этади;

• Илҳомий шеърларда маиший қобиқлардан чиқиб, чексизликка интилиш парвозлари бўй кўрсатиб туради;

• Шоир ўз шеърини санъаткорона ижро этолмаслиги мумкин, аммо, юксак санъат даражасида шеър битиши муҳим;

• Тиниқ ва илиқ илҳом булоғида қайнамай, қайноқ ва қийноқ туйғуларга ғарқ бўлмай туриб шеър ёзиш мумкинми?!

• Хассос шоирларнинг мумтоз шеърларидан илҳомланмаган қалб таассуфки, уруғ қадалмаган тупроққа ўхшайди;

• Шеърият борки, қалб олами мунаввар; ғазалиёт ёрки, дил найидан наво таралгай; ашъор битгайки, кўнгил бўстони гул-гул очилгай;

• Шоир илҳомга ошно-ю сўзга ошиқ бўлиб, ўзини ишққа яқин-у туйғуга оқин тутиб, хаёлот қанотларига суяниб, кўклам кулганда суюниб Тонгни кутади;

• Булбул ёниб сайраса навобаҳш белги, балки, кўнгил қушинг куйлайди қўшиқ. Ёмғир шаррос ёғар кўкдан ишора, ажабки, қалбингда ҳам гумбурлар чақмоқ. Хушбўй сабо елса не бир аломат, дилдаги ифорларни таратар гўё;

• Кўкарган заминда қуёш оташи нурларининг изи бор, билки, у жон томирига туташган қувват илдизидир.

Муслима Ҳамроз

29.03.2023 йил