МУМТОЗ НАВО ИСТАРАМ

«Истарам етсам қуюндек гул узорим қошиға,
Оллида туфроқ ўлиб эврилсам анинг бошиға»
Алишер Навоий

Эй, дил, чашму қароғингни ғафлат босмасин ногоҳ.  

Нечун бунча безовтасан, саркаш чекурсан оҳ-воҳ,       

Кўнгил мулкин безар бўлса хушёр нигоҳ истарам,
Илҳом сеҳри бўлса душвор, дили огоҳ истарам.

Дармон излаб чопдим гирён, армонда қолдим бироқ,
Мунгга тўла кўнглим ёнсин, ёқолсам ёруғ чироқ.
Ишқи дилруҳ чорласа мен, асрори роҳ истарам,
Пинҳон дардин чеккан эрса, аҳбори роҳ истарам.

Тафаккурни тийрак тутиб, ҳисларим этсам иқрор,
Туйғу жўшиб жондан тошсин, жилоси топсин қарор.
Сози ҳамроз нола этса, кўнгли бедор истарам,
Ўй-у хаёл жола тутса, қалқиб мадор истарам.

Кўкка туташ толаларга боғлангай манзил-маво,
Дил изҳорин қабул этсун, тобланиб азми аъло.
Жонга шавқи оққач яна, мумтоз наво истарам,

Сурур истаб этгач тасниф, роҳи раво истарам.

Ранжу алам қийнаб маҳзун, етарми коми даво,
Итоб этмай сукут қилсин, маҳв этиб кори ғавғо.
Андуҳ чеккач мужда етса, дури шафо истарам,
Ки ғамбода оҳга етса, пури сафо истарам.

Зийнатланган қитъа тилаб, субҳи дам битсам гоҳ-гоҳ,
Гириҳ ичра кошки бир ҳол иноят этса Аллоҳ.
Ғамнок бағрим рўшно этсин, нури чароғ истарам,
Нақшин безар бўлса магар, сири фароғ истарам.

Шеъриятда султон эрур, Навоий сўзи гавҳар,
Онча борки руҳга пайванд, ишқ аро мисли жавҳар.
Ўртанган дил нола чекса, жазба кўпроқ истарам,
Япроқ ёзмоқ илинжида, хушнам тупроқ истарам.

Ғазалиёт аро кезиб изласам тиғи қалам,      Сийратини ошкор этиб қийнагай доғи алам.         Кел эй, ҳуркак оҳу, оҳким, зийрак ғазол истарам,               

Дилни дилга боғлагувчи дилбар ғазал истарам.

Эй, дил, кезиб гулшан аро, истагил тийрак сабоқ,   

Назми чаман ичра куйлар, хушроз булбули сайроқ.
Мушфиқ кўнглим ишққа тўлсин, жилва офтоб истарам,
Қалбим торин чертгувчи боз, нури маҳтоб истарам.

Муслима Ҳамроз. 13.01.2022 йил

Изоҳ: Саркаш-итоатсиз; нигоҳ-назар солмоқ; душвор-қийин; гирён-йиғламоқ; асрор-сир; роҳ-йўл; пинҳон-яширин; аҳбор-дўст, ҳамроҳ; жола-томчилар; азм-қарор; мумтоз-сараланган; раво-амалга ошувчи; тасниф-асар; сурур-шодмонлик; ком-орзу; итоб-маломат, таъна; маҳв-йўқотиш; мужда-хабар; сафо-ёруғлик, шодлик; қитъа-парча; субҳи дам-эрта тонг; гириҳ-тугун,чигал; жазба-кўнгил интилиши; тийрак-сезгир; жилва-нурланиш; боз-яна; маҳтоб-ойдек.