ИНЪОМГА ТЎЛА

Сувсиз бир қудуққа тушиб қолгандек,
Чорасиз боқасан осмон фалакка.
Нажот йўқ, атайин дилга солгандек,
Кўз тикдинг эришиб бўлмас тилакка.
Овозинг бўғриқиб келар олисдан,
Сўлғин бир япроқдек ерга тўкилар.
Тилгувчи тушкунлик тиғи боисдан,
Омонат қалб чоки ҳайҳот, сўкилар.
Ёмғирли мавсумда тошқин бошланиб,
Тўлқинлар мавжланиб тўлса қудуқ ҳам.
Сузмоқлик ишқида чиққил хушланиб,
Ғанимат инъомга тўла дам бу дам.
Юзага чиқолсанг, тубнинг қадрига
Етишмоқ машқини дилдан туярсан.
Қалб туйғун тўлғонар бардош сабрига,
Курашмоқ сирларин шундай суярсан.

Муслима Ҳамроз
19.01.2023 йил