Кўнглинг ичолмаган…

Тонг бўлиб уйғонсам шафақларингда,

Шуълага қоришган кунга ўхшайман.

Меҳрингдан қизғанган шафқатларингда,

Туйғулар титратган мунгга ўхшайман.

Ёғдулар жилваси чароқларингда,

Мунаввар ифорли гулга ўхшайман.

Ҳамроздил яқину йироқларингда,

Иқболга интилган йўлга ўхшайман.

Озор томчилайди сабоқларингда,
Сабри жаранглаган бонгга ўхшайман.
Хаёл чопқиллайди ардоқларингда,
Соҳил қўмсаётган тонгга ўхшайман.

Денгиз шовуллайди қароқларингда,
Чўкиб кетаётган нилга ўхшайман.
Не сир шивирлайди қабоқларингда,
Ичиб чанқаётган дилга ўхшайман.

Мовий мавжланади офоқларингда,
Кўнглинг ичолмаган рангга ўхшайман.
Ишқинг ганжланади нифоқларингда,
Тўлқин кечолмаган жангга ўхшайман.

Муслима Ҳамроз
25.07.2023 йил