Қандайин жола

Гўзаллик тасвирига айланган муаззам сўзлар эрк қанотлари узра хаёлот фазосида муаллақ учишади. Уларга мафтун бўлиб ўзингга чорласанг, аввал, улар кўнгил осмонидаги мовий барқутларга қўнишади. Бу қандай ёмғир, қандайин жола?! Гўё, олам томирига томар ҳаёт томчиси! Томчилар ёмғир сирига тўлиб-тошиб қалбинг довотига қуйила бошлаганида руҳинг илҳом қанотида ҳузур-ҳаловат туйиб уча бошлайди. Шунда ошуфта қалбингга қулоқ тутасан ишқни соғиниб. Беихтиёр қалбинг саҳифасига Сўз битасан завқ-шавққа тўлиб. Сўз сеҳрига ошно бўлишни истайсан, гўзал сўзлар ифоридан хушланиб ўз кўнглинг гулбоғига сайрга чоғланасан.

Муслима ҲАМРОЗ

19.07.2023