Чақмоқ сўз

Шеъриятнинг гўзалликка уйғунлиги шунда намоён бўладики,  унда ноёб ва латоиф сўзлар ярқ этиб чақнайдиган ҳолатларга дуч келасиз. Баъзан бундай чақмоқ сўзлар маъноси мавҳумлик гирдобида айланиб, тушунишингиз мушкул туюлади ва кўнглингизни туман қоплагандек безовталанасиз. Гўё, издиҳом ичра руҳафзо маъво топиб олдингизу, энди ҳайрат уммонига ғарқ бўлаётгандек ҳис-туйғуларни бошдан кечирасиз, ажабланиб. Уни ойдину равшан этмоқликни истаб фикрат учқунлари ила сийлайсиз ва  моҳият сирларини англашга интиласиз. Ноёб сўз сийрат иншосини талаб этади, унинг мағзини чақишга киришасиз. Ниҳоят унинг ё мис, ёки кумуш ёҳуд тилло  имлосини фарқлай бошлайсиз. Унинг аҳамиятини англаш жараёни сизни сеҳрли оламга ошно этади. Шеъриятни ҳис қилиш туйғуси қалбингизни сурурга тўлдиради.

Муслима Ҳамроз

13.09.2024 йил