Асрайди

Эй, армонли дунё, қайғу уммони,
Шодлик кемасини чўктирган бўрон.
Тўлқин мавжидаги кўнгил армони,
Ваҳима чирқирар, тинмайди сўрон.

Руҳланиб учмоққа борми имкони,
Бир томчи талпинар кўк сари ҳайрон.
Ишқ жоласи чорлар, чўккан ҳамони,
Етмоқлик маҳолдай қийнайди ҳижрон.

Эй, умидбахш дунё, сукут дармони,
Саодат асрига чорлайди бийрон.
Рўёкор очуннинг маккор фармони,
Саҳронинг чангига қоришар буҳрон.

Эркинлик истайди мисоли жайрон,
Кўнгилда шовуллар чексиз ўрмони.
Тангрининг измида, ўзи ҳукмрон,
Одамни асрайди меҳвар эҳроми.
Муслима Ҳамроз
17.10.2024 йил