Янгиланиш

 Сой бўлибон оқаман, оқавераман,

Сукутнинг оҳи дардчил чўкар шарқираб.

Нур сеҳрини тиниқиб уқавераман,

Ойнинг шаффоф сояси сузар ярқираб.

Теранроқ илдизларга етавераман,

Дов-дарахтлар тутмангиз оёқ-қўлимни.

Нур энган манзилларга кетавераман,

Ўтинчим бор, тўсмангиз умид йўлимни.

Томчи бўлиб кўкларга кўчавераман,

Шукроналик қалбимни чўлғаган ҳар дам.

Уммон шавқини қониб ичавераман,
Тўлқинларга айланиб сузсам дамодам.

Маконни янгилагай замон нафаси,

Бу ўткинчи дунёнинг ўтинчи бўлиб.

Покланмоғу яшнамоқ кўнгил сафоси,

Гар, ёғдуга интилса нурларга тўлиб.

Муслима Ёдгорова