Тафт

Оқяпман, шамдайин эриб оқяпман,
Зулумот муздайин, нурга тўймайди.
Бағримда оташин шуъла ёқяпман,
Липиллаб қўққисдан соя ўйнайди.

Тўкилиб тугарми вақтнинг зарраси,
Соврилган оловни сира суймайди.
Битарми жизғанак кўнгил яраси,
Чирмашиб толиққан пилик куймайди.

Эрк истаб ташналик дардин ичяпман,
Чўкмаган кўнгилда хаёл қайнайди.
Қўлимда машъала уммон кечяпман,
Оловнинг тафтини шамол қийнайди.
Муслима Ҳамроз
14.02.2025 йил