Нур чашмасин ичар қорачиқ

Рангга оҳанг эврилиб таралса зиё,

Рангпар кўнглинг интизор дарчасини оч.

Ич-ичингдан порлагач

боққин-у қиё,

Булутларга қорайган

андуҳларинг соч.

Тун қўйнида ёвузлик очмасин қулоч,

Шамсиз кўнгил уйининг сиёҳи сиё.

Шуъла сочса қалбингга нурафшон тилмоч,

Ишқ ўтида чўғланиб

бўлгил маҳлиё.

Алдамчи бир саробга ўхшайди рўё,

Ранглар унсиз бўзлайди, сарғайган бўздай.

Қора ўра домига тортмасин риё,

Тиниқ оҳанг қалбингда яшасин ўздай.

Ранг бўлмаса зулматга чўкади дунё,

Рангин кўнглинг фазосин асрагин кўздай.

Нур чашмасин қорачиқ

ичади гўё,

Ёруғ томчи кўксига

ёзилган сўздай.

Муслима Ҳамроз

21.05.2024 йил