Кетаётирман…

Дилда қуёш ёндирган олов туйғулар,
Чорлаётир қизариб хазон юзида.
Тўкилиб кетаётир
сўлғин қайғулар,
Саратон куйдирганми
ўтган ёзида.

Лаҳза-лаҳза кечмишин юклаб кўнгилга,
Кечиб кетаётирман излаб ўзимни.
Тасодифми куз соғинч йўллайди дилга,
Зарҳал ҳис-туйғуларга бўяб сўзимни.

Қизғиштоп тўшамалар ёяр олтин куз,
Уфқига томчилайди юрагим қони.
Эй, фалак, азал таслим тугунларин уз,
Чал, ошкора янграсин
ҳуррият бонги.

Муслима ҲАМРОЗ
03.09.2025 йил