Булутнинг сояси

Ҳаво тўлқинида оқолмай қолдим,
Булутнинг сояси елкамга тушди.
Қуёшнинг чўғида исинсам ёниб,
Олов ичган ўнгим омонат тушдир.

Самовий маъвога боққаним чоғда,

Кўзгунинг жилоси кўзимда унди.

Оламнинг аксига кўникиб қолсам,
Кўнглим тошлоғида гулгиёҳ ундир.

Тахайюл тизгини ечилиб кетгач,
Маконлар сочилиб, чексизлик кўчди.
Мен кўрган дунёнинг ороми йўқдир,
Тириклик чархида абадий ўчдир.

Муслима ҲАМРОЗ
01.12.2025 йил