Қайтиб келдим

Қуёшга юз тутиб куйсаму ёнсам,
Жавзода эврилиб кетсамми ёзга.
Суйибман, суюнма ўзимдан тонсам,
Қалбим илк чолғучи навобахш созга,
Найнафас нурталаб, эркдайин улуғ.

Соғинчим сарғайгай кўнгил боғида,
Кузакда эврилиб кетолсам кузга.
Тийрамоҳ муҳташам айни чоғида,
Ҳуснига боқаман зориқсам сўзга,
Билмам, нечун қийнар қаҳрабо ғулу.

Оппоқ туйғуларим авайлаб поклаб,
Не бўлгай эврилиб кетолсам қишга.
Қалбимга ўчмас бир ўт-олов қалаб,
Васфи олам ичра тўйинсам ишқга,
Ҳар тонгда уйғоқ оқ қордайин уйғун.

Ҳаловат топмадим изтироб чекдим,
Зилола томчидек қалқдим изҳорга.
Гўзаллик туйғусин кўнглимга экдим,
Қайтиб келдим такрор гулгун баҳорга,
Зумрад кўклам дилда товланган туйғу.

Муслима ҲАМРОЗ
27.12.2025 йил