Шукроналик

Субҳи тонгда уйғонар экансиз, деразани ланг очиб, оппоқ нур зарраларига тўйинган ҳавони симирасиз. Кўзингиз нурга тўлиб, кўнглингиз равшан тортганлигини ҳис этасиз. Ям-яшил баргларнинг тонг насими олиб келган шукроналик шивирига қулоқ тутасиз.
Қушлар чуғурида шукрона иқрорига хос саслар атрофга ёйилади.
Тинч-осойишта ва обод юртда бехавотир яшаш завқи қалбингизни қувончга тўлдиради. Қуёш шукроналик нурларини олам кенгликларига сочади, сочаверади. Буғдойзор ҳам ризқ деб аталмиш шукроналик хирмонига айланади. Боғ-роғларда ширага тўйинган шукроналик туҳфалари халқим дастурхонига тўкилади.
Гулзорларда гулу райҳонлар шукроналик атрини сочади. Анҳорлардан таралади шукр шовури.
Дунё тинчлигини, эл фаравонлигини тилаб дуога қўл очар экансиз, қалбингиз шукроналик туйғусига лиммо-лим тўлади. Ҳаётдан рози бўлишлик, сабру-қаноатлилик хислатлари шукроналикка вобаста туйғудир. Бу ёруғ оламда турмушнинг ўнқир-чўнқирида қоқилиб-суриниб борар эканмиз, ёруғлик ва зулмат кураши ҳақидаги тасаввуримиз ойдинлашиб боришига гувоҳ бўламиз. Ҳаёт гўзаллигини севиш ва бу фоний дунё ғулуларидан оғриниш қувонч-у ғам ташвишлари эканлигини англай бошлаймиз.
Ҳаёт инсонга Яратган томонидан берилган неъмат эканлигини ҳис қиларкансиз, шукр ҳикматини чуқурроқ ҳис эта бошлаймиз. Ҳаётни Борлиги ва Бутунлигича севганингиз сайин миннатдорлик ва мамнунлик қалбингизга ҳаловат бағишлай бошлайди.
Дилда уйғонган шукроналик беихтиёр тилимизга кўчади.

Муслима ҲАМРОЗ
22.04.2026 йил