дилда сукут топ!

Қўлингдан тортқилайди вақтнинг шамоли,
Тун пардаси ортида
тушнинг жамоли,
Тез югур,
тезроқ чоп!
Кўнглинг уйқучи.

Бир оний шабада силар сочингни,
Алдоқчи туйғудан олар ўчингни,
Тез югур,
тезроқ чоп!
Кўнглингни қучиб.

Тўс-тўфонлар қувлайди вақтни тўзғитиб,
Бўронларда чирпирак дамни изғитиб,
Тез югур,
Тезроқ чоп!
Умринг кўчкиси.

Чўкиб кетаверсанг гар вақтнинг қаърига,
Дақиқа довдирайди, дучор
қаҳрига,
Тез югур,
Тезроқ чоп!
Замон кўчгуси.

Ичингда жиринглайди нодир қўнғироқ,
Ўқдай отилган дамнинг изи қинғирроқ,
Тез югур,
Тезроқ чоп!
Дилда сукут топ!

Ҳориган хаёлларинг тин олмоқ истар,
Вақтдан ўзиб кетмоқлик азалий истак,
Тез югур,
Тезроқ чоп!
Сокин қалбинг топ!

Муслима ҲАМРОЗ
07.05.2026 йил