Сентябрь

Кундан тежаб вақт сакрагай тунга тимсиз,

Бири озиб,

бири тўлиб боравергай-ми,

Гарчи ҳаво

ҳарорати титрар қўнимсиз,

Иссиқ-илиқ

навбатини беравергай-ми,

Саховатга 

тўлиб  кетгай табиат қўйни,

Тенгкунликнинг

ва ниҳоят фурсати етиб.

Элим шу кун 

нишонлайди “Меҳрижон” тўйни,

Дилда, тилда 

Фаровонлик шукрини айтиб.

Сентябр-да,

сарғаймоқда кунларнинг ранги,

Сўлғин боқсам

ич-ичим ҳам бўлгай заъфарон.

Гўё бағрим

дилбоғида мавсумлар жанги,

Ўй-хаёллар

минг тайсаллаб, бўлгай паришон.

Ўтди ёзлар.

Кузатаман кузнинг камолин,

Хазонрезги

тўсмасин деб умид йўлларин.

Куз бағрида

ошкор этса кўркам жамолин,

Мен тутаман

гулбаҳорнинг яшил қўлларин.

Муслима Ҳамроз   1.09.2021 йил