Фасллар

Кумуш қишнинг нотинч охирги туни,
Қорнинг намчил ҳиди анқийди гўё.
Навбаҳорнинг интиқ биринчи куни,
Гуллар хушбўйига тўлади дунё.

Ўтаётган ҳар ойларнинг армони,
Вақтнинг ҳовучида титрайди эссиз.
Отаётган ҳар тонгларнинг дармони,
Кўнгилни тўлдирса кетмайди изсиз.

Фасллар ичимизда кезар ҳамоҳанг,
Фурсатини кутиб, тўлиб-тошади.
Гар гуллашу хазон аро кечар жанг,
Курашлардан ҳаёт завқи ошади.

Балки фаслдан фаслга оқиб кетамиз,
Чархпалак гардиши мавсумий макон.
Дунё қирғоғига туйқус етамиз,
Оламни англашга топгулик имкон.

Муслима Ҳамроз. 26.02.2022 йил