Алвон қалам. Шашқатор

Илло бир дарахт мисол кўкардим, ўсдим,
Ўз юртим тупроғини қучиб, тўйиниб.
Йўлимни гарчи тўзғин хазонлар тўсди,
Кўнглимнинг кўкламига етдим суюниб.
Қалбимда туб отибон яшнай олсайдим,
Беғубор туйғуларда яшаб қолсайдим.

*****

Тақдир тоъле тилаб қўлимдан тутгил,
Иқбол армон бўлиб қолмасин ҳаргиз,
Чалкаш йўлларингда адашмай буткул,
Қалбим нилгун маво, кезгайман ожиз.
Олам асрорида нени билмадим,
Ўзинг билгувчисан, мубҳам қилмадим.

*****

Шеъриятнинг алвон қалами
Ёлқин тусли йўллар чизгайдир.
Қайнаб тошса илҳом булоғи,
Ҳар сатрида дурлар тизгайдир.
Ашъор бўлиб тўкилган очун,
Алвон қалбни қийнайди нечун?

Муслима Ҳамроз. 18.12.2021 йил