Болаларга

Айни қиш

Булутнинг бағри бўлиб минг бўлак,
Осмондан тинмай сир ёғар лак-лак.
Айни қиш фасли қор кўрпа тўшар,
Беғубор оппоқ умидга ўхшар.

Биз учун тайёр бўлар яхмалак,
Агар муз билан қопланса йўлак.
Майдонча сирти роса сип-силлиқ,
Қувнаймиз шодон учиб сирпанчиқ.

Муз пойга кутиб бўламиз ҳалак,
Қор хатга битиб чин дилдан тилак.
Чўчитмас совуқ, қиш завқин тотиб
Ўйнаймиз яйраб, қор копток отиб.

Эҳ, афсус, қаранг, эриб сумалак
Бўғотдан аста томмоқда чак-чак.
Илитар офтоб боқиб том оша,
Бошланар энди бошқа томоша.

Муслима Ҳамроз
11.12.2022 йил