Тўртликлар
Меҳр-саҳоват тиласанг китоблар улаш,
Ёшларга мадад бўлгай эзгу тафаккур.
Гар, маърифат тиласанг китоблар улаш,
Маънавий бу чашмага минг бор ташаккур.
***
Дард учун бу дунёга келгайми одам,
Гардларини ювади тинмайди сира.
Истиқбол-чун йўлчироқ яратиб илдам,
Ўтгай истакларига бўлиб асира.
***
Кўнглингнинг сандиғида гина сақлама,
Вақтнинг терс шамолига совургани бер.
Бировларни қоралаб ўзни оқлама,
Огоҳ бўлгил адоват қалбни эзиб ер.
***
Кўп эзма гапиргандан эшитмоқ яхши,
Яхши сўзни ўзга хўб эш этмоқ яхши.
Маъноли сўз достон эт мисоли бахши,
Бўлолсанг бўл доимо яхшининг нақши.
***
Дунё излаб дунёни кезгайдир банда,
Англамасдан ишқ жоми тошганин ўзда.
Руҳ тўфонлар тўзғитиб кезгайдир танда,
Дунё чироғи алҳол сўнгайдир кўзда.
***
Устознинг ҳар сабоғи ҳикмат бўлганда,
Ҳар шогирднинг қалбида эзгулик унгай.
Маърифат улашмоқлик ҳиммат бўлганда,
Комилликка чорловчи бир маёқ ёнгай.
***
Адаб талаби эрур ахир кечирмоқ,
Ёмонлик ёзувини дилдан ўчирмоқ.
Камчилигу нуқсонни мумкин тузатмоқ,
Эзгуликдир кўнгилнинг мулкин безатмоқ.
***
Мум тишлагин доимо бадхулқ сўздан қоч,
Ҳаттоки, қарғишдан ҳам қулагай оғоч.
Атрофингга самимий ёйганда қулоч,
Хушмаъно тилакларга қалбингни кенг оч.
***
Дилларни оғритиб сен сўзлама зинҳор,
Ва қасдма-қасдликни ҳам кўзлама зинҳор.
Гард-ғуборга тўладир ёмонлик саси,
Эшитган ҳар одамнинг қотар энсаси.
***
Кесатиқ сўзлари тиғ тирнаб кесгайдир,
Бадхулқлик тўфони минг инграб эсгайдир.
Юмшоқ сўзласанг агар майин ёққайдир,
Дилдан дилларга меҳри сеҳри оққайдир.
***
Ҳақ гапни ангалагувчи ёру дўст қани?
Солиҳ ўзига ҳамроҳ этгайми сани?
Манмансировчи йўлдош юлгай ёқангни,
Ҳамсуҳбатингни ҳаргиз аслини тани.
***
Инсон боққил оламга дунёсан ўзинг,
Дунёнг қолиб оқибат ўзинг кетасан .
Ҳарчанд дунё истама тўймайди кўзинг,
Ўз-ўзингга интиҳо бўлгач нетасан.
***
Ҳеч ёмонлик тилама қалбинг ўлмасин,
Бор савобни булғовчи гардга тўлмасин.
Гар, кўнглинг обод эрса забонинг ширин,
Меҳринг нури сояда қолмас яширин.
***
Хулоса чиқармоққа шошилма зинҳор,
Танганинг терс томони мавҳумдир, балки.
Хўб ўйлагил фикрингни этганда изҳор,
Ҳақ баҳойинг яхшилик ҳукмидир балки.
***
Қорачиқ дунёсида кўргайми ўзин,
Омонат бу дунёга босганда қадам.
Оламлар дунёсига йўллайди сўзин,
Тўймаган кўнглин алдаб кетгувчи одам.
Муслима Ёдгорова
