Умид ёзади япроқ

Каллакланиб нафаси буғилган дарахт,

Шамолларда қилт этмай унсиз бўзлайди.

Чуғурчуқлар шивирин эшитмас, карахт,

Ёлғиз япроқ шитирлаб нени сўзлайди?!

Ёмғир ёғса ичади булутнинг сирин,

Туб-тубидан ўсганда янги минг ришта.

Қуёш нури эркалаб йўллайди нурин,

Атрофида парвона яшил фаришта.

Энди умид кўкариб ёзади япроқ,

Юксакроққа бўй чўзиб қаддин ростлайди.

Ич-ичига доира чизади кенгроқ,

Йиллар ўтиб барглари кўм-кўк потрайди.

Ишққа зорин инжитса кўклами шоён,

Борлиқ тинглар эзгулик тархи мисоли.

Покланмоқлик мезони синовда аён,

Яшил япроқ кўкламнинг ўтли тимсоли.

Муслима Ҳамроз

31.12.2022~1.01.2023