Туман

Қуюқ туман чўкмоқда,
Оғир-оғир хўрсиниб.
Намчил дардин тўкмоқда,
Олгудайин бир тиниб.
Шода-шода томчи-соф,
Қўнмиш дарахт шохига.
Ғира-шира чор-атроф,
Етмас маҳзун охига.
Қора туман қопланиб,
Доғ қилмасин кўнгилни.
Томчи-томчи тўпланиб,
Поклай олсин дил-дилни.
Тарқаб кетса гар туман,
Осмон бағри очилгай.
Кўм-кўк яшнаб ҳар суман,
Гуллар атри сочилгай.
Офтоб нури тиғласа,
Булут чоки сўкилгай.
Қалбинг шами чўғласа,
Бор ғуборлар тўкилгай.

Муслима Ҳамроз
5.02.2023 йил