Бугун билан суҳбат

Бугун билан суҳбатлашасан тонгдан тунгача,
Саволлар излайсан ўткинчи вақтнинг қатидан.
Жонсарак кезгансан маконни айни кунгача,
Жавоблар тополмай мавҳумот замон қатлидан.
Яна талай ожиз саволлар туғилса дилда,
Жумбоқ жавобини ҳар хушхон онлардан сўра.
Истасанг гар тиғдайин қийиқ топилар қилда,
Ғамбода дилингни сурурваш дамларга ўра.
Ўтган кунлар ўтинчи ўртаб қийнайди сени,
Ёзилган битиги хотирдан ўчмайди сира.
Билмассан тақдир эрта туҳфа этади нени,
Сўровинг сўр, кўнгил ойнаси тортмасин хира.
Ажаб ўнгу терс ўгирилиб тураркан кўнгил,
Яхшилик-ёмонлик томонга, гоҳ-гоҳ алмашиб.
Найсон ёмғиридан ичса гарюмшагай ҳар гил,
Дил навога тўлгай эзгулик билан тиллашиб.
Тингла сенга имкон сирини сўзлайди бугун,
Яхшилик тарафга дадилроқ бургин йўлингни.
Омад кулиб боққанда осон ечилгай тугун,
Тийрак боқиб англай ол хушёр ўнгу сўлингни.