Нидо таралар…

Тол баргак тақиб қувнайди навниҳол қизлар,
Қирқ ўрим сочин тортқилар шабада елиб.
Дашт-дала кўм-кўк, чуғурчуқ чучмома излар,
Дил тановарга тўлгайдир  навбаҳор келиб.
Тол новдасидан чалмоқда чилдираб ҳуштак,
Ҳув, ана, бошда дўпписи ярашган бола.
Эҳ, жимитгина чолғуси чулдирар қушдак,
Ич-ичдан ёниб, ўртаниб, инграйди нола.
Бир нолон нидо таралар уйғонинг дея,
Эй, элдошларим, муборак уйғониш фасли.
Гул-гул очилган боғида кўнгилни аяб,
Биз Борлиқ ичра омонат яшаймиз  асли.

Муслима Ҳамроз
11.03.2023 йил