Бонг - Muslima Hamroz

Алмисоқдан қолган дунёсан, дунё,
Мозийданда кўҳна қадимроқ ҳаёт.
Ўтмишданда йироқ эскироқ кун, ё
Ҳақиқатнинг олов кўксида баёт.
Янгиланган даврон қуббасин кийиб,
Йўлга чиқдинг шошиб довонлар оша.
Қолаверди олам ўчоғи куйиб,
Одамларнинг ғафлат уйқуси ўша.
Қўнғироғинг чалсанг бўлғуси дармон,
Жаранглатиб огоҳ хушёрлик сасин.
Янгилансин бари, қолмасин армон,
Дилдан дилга кўчсин тозариш ҳисси.

Уйғонсангчи ғофил оломон, етар,
Янги дунё янги курашга чорлар.
Буюк йўлда порлоқ манзиллар кутар,
Тийрак назар солгай иқболга зорлар.
Замонанинг бонги уйғотар тонгни,
Уйғонсанг-чи халқим қуёшинг балқсин.
Ғуборларни қувиб, тозалаб онгни,
Юрак жўшиб қонлар томирда қалқсин.
Асрлар ошдинг, шахдам одиминг илдам,
Курашларда бедор тоблангил мағрур.
Келажакнинг ёрқин маёғи ҳамдам,
Турон бағринг қучсин ҳурликни масрур.