Шукроналик

Дардларинг қийнайди афғон чекасан,
Бардошинг етмайди,
нолиб яшайсан.
Топталган кўнгилга
нечун чўкасан,
Жаҳд айлаб йўлга чиқ,
ғолиб яшайсан!

Изласанг топганинг армон бўлмасин,
Чин дунё жамолин қўмсаб яшасанг.
Кезганинг чорбоғлар хазон бўлмасин,
Гулизор кўнгилни истаб яшасанг.

Садоқат улғайди меҳринг ишқида,
Қалбингда шукрона озод яшнагин.
Майсалар кўкарди сеҳринг ишқида,
Чаманга айланиб обод яшнагин.

Қуёшга айланган шукрона кўкда,
Қалбингга кўчириб ёниб яшагин.
Уммондек тўлғонар шукринг шукуҳи,
Тўғон тарновида қониб яшагин.

Муслима ҲАМРОЗ
04.04.2026 йил