ҚАЛБ ГАВҲАРИ

Ўқимоқлик ва уқмоқликнинг ирфоний талаби бор. Аввало ўша даражадаги мақомга эришмоқ лозим эмасми?! Қалбни сўзга очмоқлик, унинг сеҳрига  ошиқ бўлиб, ботиний кўзлар ила боқиб латоиф ҳуснига мафтун бўлмоқлик даркор эмасми?! Эзгу сўзларни ўқиб, тўғри маъно чиқармоқ, жон қулоғи ила тинглаб, қалбга жо этмоқ, ақлу заковат фикрати ила англамоқ умидида китоб мутолаа қиламиз. Ўқиганимиз ҳар эзгу сўзлар онгимизга кўчиб ўтиб, яхшилик амалларига бўйсинмас экан бундай қироатдан не наф. Хоҳ дунёвий бўлсин, хоҳ диний бўлсин билимлар тафаккуримиз чиғириғидан ўтиб, ичимизда порламас экан қалбимиз ёришмагай. Китоб мутолаа қилар эканмиз, қалбимиз, жисму жонимиз ва руҳимизни бир бутунликда ҳамкорликка чорламасак хаёлимиз мудом бўшлиқ сари қочиб қолаверади. Бутунлик покликда, ҳурликда зоҳир бўлгай. Албатта, камолотга эришмоқ йўлида китобга ошнолик, чин маънода мубталолик муҳим аҳамият касб этади. Эзгуликлар битилган китобдан топган дуру жавоҳир сўзлар ҳикмати қалбингизни поклашига имонингиз комил бўлишини истардим! Тилагим, ўз ички оламингизни ғуборлардан тозаламоқ мақсадида, қалб гавҳарига жило бермоқ умидида китоб ўқинг.

Муслима Ҳамроз

8.05.2023 йил