Муҳаббатнинг иқлимига кетайин кўчиб

Менга ғолиб бир сўз айтинг, эркка тўла сўз,
Қанотида парвоз этай, кўкларга учиб.
Оппоқ тонглар оғушидек ойдин, беғубор,
Тилакларим йўллай олай оламни қучиб.

Менга нурли бир сўз айтинг, оҳанг тўла сўз,
Дил созимни жаранглатсин қулфини очиб.
Менман ахир дилбар сўзга ошиқ, интизор,
Мумтоз наво садо берсин атрини сочиб.

Менга мушфиқ бир сўз айтинг, ишққа тўла сўз,
Лайли янглиғ маст бўлайин тотини ичиб.
Саҳро сари излаб борай, гар Қайс дилизор,
Фироқ ўтин, висол туғин кўксимга санчиб.

Менга жўшқин бир сўз айтинг, меҳри илиқ сўз,
Муҳаббатнинг иқлимига кетайин кўчиб.
Англаб етгач очун асли ғариб бир бозор,
Дун-дунёнинг ғавғосидан осонроқ кечиб.

Менга эзгу бир сўз айтинг, айни порлоқ сўз,
Яхшиликдан мағзи гўзал маънолар бичиб.
Ороланган ҳар бир қалбни безасин оҳор,
Ором топсин ҳаловатда ботини тинчиб.

Менга ҳамроз бир сўз айтинг, сеҳри сирли сўз,
Мафтун бўлиб авайлайин маъносин ечиб.
Қалб тубида латоифдир билсам чин изҳор,
Дил шарорин йўллай олгач риёдан қочиб.

Муслима Ҳамроз
29.06.2023 йил