Манзара сочади соҳил

• Наҳот, соҳиллар ҳовучида ича олгай уммон чашмасин;
• Денгиз тинмай тебранади, қирғоқ-арғимчоқ;
• Ажаб, соҳиллар анҳорга лаб сунади соғинч симириб;
• Ҳайҳот, соҳиллар сувсаб ранж чекгай саёз сойнинг бўйида;
• Сузолмаган соҳил гўё гилсимон армонни сипқориб тўймас;
• Оқин туш кўради сув томирига занжирбанд қирғоқ;
• Парвоз руҳи келгайдир учиб, соҳил уфққа туташиб кетгач;
• Чиғаноқлар соҳилни томоша қилгач, уни безайди қопқасин очиб;
• Соҳир соҳиллар тошқин оғушида сув сочини эркалар қучиб;
• Ҳовуз қирғоғи мунғаяди мажнунтол соясини елкага ортиб;
• Дала қирғоғида лойқа сувни симиради ариқ пилдираб;
• Қақроқ соҳиллар саҳий тўлқинни симиради тўйиб, қониқиб;
• Серзавқ соҳиллар оқизоқ ўйнайди бағрини очиб;
• Не тонг, соҳиллар яйраб уйғонади тўлқин шавқида;
• Оройиш соҳиллар ўз бағрини ювар сойнинг шаштида;
• Томирларга туташ соҳиллар дарё ўзанини қучади, соқчидек хушёр;
• Ночор инграйди тўлқин зарбидан, бағри ўйилган қирғоқ;
• Маҳзун соҳиллар анҳор шивирини тинглайди мудом;
• Сайҳон соҳиллар ўз дарёсида оқмоқ истагини тасвирлаб ястанар интиқ;
• Ажабо, йиллар соҳилларни оқизмоқ истайди, умидбахш кемаси томон;
• Ҳаёт уммонида сузаётган одам учун ажойиб манзара сочади соҳил;
• Оққан дарё оқаверар қирғоқ қўйнида, сир яшириб соҳил саҳнида.

Муслима Ҳамроз
06.08.2023 йил