Соғинч - Muslima Hamroz

Сендан дарак бўлмади, сирдошим соғинч,
Ҳаёт ишқин гирёна соғинмай бўлмас.
Ишқий дардга ошуфта улагай боғич,
Дардга интиқ кўнгиллар бедаво ўлмас.
Оппоқ тонгни соғингай оромга тўйгач,
Йўқса кўнгил нурафшон зиёга тўлмас.
Ойдин ойин тополмай зулматни туйгач,
Осмон тўла юлдузлар чарақлаб кулмас.
Уфқим соғинч бобида тополмас тилмоч,
Умид эса хуфёна боқишдан толмас.
Очун чандон соғиниб очганда қулоч,
Сири балким бағримни азоблаб тилмас.
Ашъор сеҳри соғинчин синайди ўтинч,
Қалқиб турган сўзларнинг сиёҳи битмас.
Ёнмас эрсанг ғалаён измида нотинч,
Холиқ хассос сўзларни кўнгилга солмас.
Соғинч ҳар он хотиржам йўлласа қувонч,
Қалбни эзиб тушкунлик озурда елмас.
Ахир дилда гўзаллик соғинчи овунч,
Сенсиз кўнгил эзгулик ҳикматин билмас.