Кўнгил сари

Ғижимланган кўнглимни силайман майин,
Текис довон бўлмайди, тўсади тоғлар.
Кўнгил сари оҳиста юрганим сайин,
Нафс илкида қийнайди сачраган доғлар.

Тунга чўккан кўнглимга боқаман аста,
Туйғуларим ўйида гўзаллик шавқи.
Кенг оламга ёйилсин нурлари даста,
Кўнгил уйин тўлдирсин рўшнолик завқи.

Азобланган кўнглимга йўллайман хитоб,
Изтироблар тоблайди, чекинма сира!
Уйғоқ тушда бормикан илоҳий итоб,
Ирфонталаб қалбимдан жавобин сўра.

Узлат истар кўнглимга сўзлайман сукут,
Хотиржамлик қўйнида ором ол, майли.
Хушёрликни шиор тут, ҳамроҳинг субут,
Эрк илҳоми ҳамиша кўнгилнинг майли.
Муслима Ҳамроз
29.03.2024 йил