Сокинлик

Қишнинг сокин тунлари узун,
Қор кўрпасин ёпинар замин.
Мўриларда букчаяр тутун,
Олов татир ўтиннинг таъмин.

Ойнинг нурин тўсади булут,
Чўкиб ётар зим-зиё бир тун.
Шовқин-сурон қишлоқда унут,
Дала-даштнинг хаёли юпун.

Музлаб қолган ҳовузда абсурд,
Сукунатни тинглайман беун.
Тош қотмасин ўйларим мақсуд,
Сир сочганда беҳудуд очун.

Юлдуз порлар мисоли ёқут,
Йўл талпинар самога мафтун.
Йўлга чиқсам чорлови барқут,
Еру осмон кўнгилда бутун.

Муслима Ҳамроз
06.12.2024 йил