Чалғимасанг…

Чангал солса кўнглингга қайғу,
Дийданг ситиб тўкилар йиғи.
Юрагингга санчилса алам,
Нимталайди бешафқат тиғи.

Оҳ, бечора мусаллам кўнглинг,
Азобларнинг ўчмайди чўғи.
Ёнаётир қалбингда оташ,
Чалғимасанг йўл асли тўғри.

Кечикдинг-ми, қайтмайди энди,
Иқболига чорлаган чоғи.
Ўтли дамлар ўртаниб тонди,
Нафасингни куйдирди доғи.

Оҳ, бедор дил порласин дея,
Томчилайди минг шамнинг ёғи.
Тўлиб-тошса жилоранг туйғу,
Ёғду сочгай нурли чироғи.

Муслима Ҳамроз
12.07.2025 йил