Адашган хаёл

Тутундан томаркан қора сиёҳлар,
Кўзёшнинг жилғаси этар мингпора.
Сўйламас бўлсалар дардчил гиёҳлар,
Ошкора этмоққа топмас бирчора.
Адашган хаёл у,
Алданган туйғу!

Эзилган кўнглида майсалар эзгин,
Камситилган аёл излайди чора.
Турмуш муштлайдими,
ҳаётдан безган,
Бахт кутиб толиққан юраги пора.
Адашган хаёл у,
Алданган туйғу!

Ажрим ёқасида ваҳима қийнар,
Турмуш ўртоғидан кутади шафқат.
Қайнона зулмидан ўксинган келин,
Ожиза қалбини ўртайди нафрат.
Адашган хаёл у,
Алданган туйғу!

Сочимнинг толаси мисли чилхивич,
Савалар сочилган бефарқ хаёлни.
Рўзғорнинг ғорида тополмас илинж,
Қутқаринг бечора мушфиқ аёлни.
Адашган хаёл у,
Алданган туйғу!
Муслима Ҳамроз
26.07.2025 йил