Ҳалинчак

Ҳалинчак
Осмонга тақилган ҳалинчакни кўрганмисиз? Унда майин тебрангай ҳузур-ҳаловат. Мовий қанотлари ҳилпирагани ҳилпираган. Менинг эрксевар кўнглимнинг мунгли ҳалинчаги у. Дардимни эркалайди, жонимни азоб доғида куйдириб. Азобланган қалбим қулфини очаман, олам гўзаллигига ишқи тушсин, дея. Ҳалинчак шукуҳида тўлқинланиб келган илҳом онларини куз остонасида орзиқиб кутаман. Кузга айланиб улгурган кунлар ҳовуридан тушади, қизишмай қўяди. Шамолнинг ҳам нафаси совий бошлайди, учиб-қўниб тўкилишга мойил манзарани чизгани- чизган. Дарахтлар маъюс тортади туйғуларим ўкинчига ҳамоҳанг бўлиб. Баҳор ва куз ораси кўнгил кўпригига туташиб кетади. Ҳалинчак эпкини кўклам насимини ёдга солганда Баҳор нафасли кузга маҳлиё боқаман.

Муслима ҲАМРОЗ
22.08.2025 йил