Ёқутдек чироғ

Тўнтарилган сохта дунёга боқинг,
Аврайди тасввур ўнг-терс мужассам.
Кўнгилнинг ёқутдек
чироғин ёқинг,
Шуъласи ёйилса, соя солмас ғам.

Кун ботиб тонг отар, қуёш бир оқин,
Тун ичра толиқиб томади шабнам.
Дунё гўзаллиги таратар ёлқин,
Шуурга эврилиб кетолсанг бир дам.

Алдамчи борлиққа банду банд эркинг,
Мавҳумот жабрида
туғилмоқ алам.
Ложувард уммонда осмондек оқинг,
Тўлқинлар мавжида сузинг дамо дам.

Юлдузлар шуъласи келарми яқин,
Қорачиқ ортида порлар эмиш шам.
Бахт излаб чиқасан тушингда, лекин,
Саробга ўхшайди бағри қон олам.

Муслима ҲАМРОЗ
19.09.2025 йил