Марварид туйғу

Оппоқ елканларни очиб юбориб,
Хаёл тўлқинида сузиб кетгайман.
Кема чайқалади, кўнглим бир уммон,
Марварид туйғуга қачон етгайман.

Дунёлар ичинда яшар оламлар,
Кўнгиллар туташса кўчиб ўтгайман.
Ирмоқлар чопқиллар баргга етай деб,
Шудринг тин олсин деб, кафтим тутгайман.

Тиниқ томчиларда борлиқ тасвири,
Самовий рахшона нурни ютгайман.
Қора ўраларга туртиниб кетиб,
Шукуҳнинг ёрқинроқ сеҳрин тотгайман.

Изоҳ: “рахшона”- порлоқ

Муслима ҲАМРОЗ
10.10.2025 йил