Хато

Жим кетасан, жимиб кетасан,
Тушларимга кирмайсан, ҳатто.
Мен тўфонлар ичра нетаман,
Бу дунёнинг сукути хато.

Қайнаяпман булоқ ичинда,
Борлиғимни чўлғайди наво.
Сукунатнинг оҳи ичимда,
Бекинмачоқ ўйнайди сабо.

Тўлиб-тошсам дарё мисоли,
Тўлқин руҳи бергайми садо.
Қалбга ғулу ғавхосин солиб,
Чексизликни қўмсагай саҳро.

Мен кетаман, мағлуб кетаман,
Уфқ ортига чорлайди хумо.
Қафас ичра жондан кечаман,
Хушхабарлар йўлласа Худо.

Муслима ҲАМРОЗ
07.12.2026 йил