Рангин сароблар

Қовжираб куйган япроқ – жароҳат изи,
Бу кўнглим афғонини тинглайди борлиқ.
Дун-дунё қароғида
қайғунинг сўзи,
Энг маҳзун туйғуларда инграйди борлиқ.

Тун томчи излаб кетар, ўхламас ҳамон,
Булутнинг қанотига йўллайди шамол.
Юлдузларга боқаман, жимжима макон,
Уфқида интизорлик келмасми малол.

Офтоб сочса олтин нур тўлишар осмон,
Рангин сароблар кезар, хаёлга уйғун.
Кун тафтида исинар тириклик омон,
Кўнгил уйига чорлар оташин туйғу.

Муслима ҲАМРОЗ
16.07.2026 йил